Question

तुमच्या मते मानवी जीवन व पक्षी जीवन यांच्यातील महत्त्वाचे साधर्म्य सोदाहरण लिहा.

Answer 1

पक्षी आणि मानव यांच्या जीवनपद्धतीत बरेचसे साम्य दिसून येते. मनुष्य हा समाजशील प्राणी आहे, त्याचप्रमाणे पक्षीही थव्याने उडतात. ज्याप्रमाणे मानव आपल्या कुटुंबात राहणे पसंत करतो, तसेच पक्षीही घरट्यांमध्ये कुटुंबासह राहतात. मानवाच्या कुटुंबात जसे माता-पिता, लहान मुले असतात, त्याचप्रमाणे पक्ष्यांमध्येही नर-मादी, पिल्ले असतात. मानवाच्या कुटुंबात माता-पिता कुटुंबाची जबाबदारी घेतात, त्यांचे संरक्षण करतात, अन्न, वस्त्र, निवारा ह्या मुख्य गरजा पूर्ण करतात. त्याचप्रमाणे पक्ष्यांमध्येही नर व मादी आपल्या कुटुंबाच्या अन्नाची व निवाऱ्याची गरज पूर्ण करतात. पिल्लांना सुरक्षित वातावरण देतात.

बदलत्या ऋतूमध्ये पिल्लांना नुकसान पोहोचू नये, म्हणून अनेक पक्षी-पक्षीण स्थलांतरही करतात. मानवही आपल्या कुटुंबियांच्या सोईनुसार, परिस्थितीनुसार स्थलांतर करतात. पक्ष्यांमध्ये पिल्ले मोठी झाल्यावर त्यांना घरटे सोडावे लागते, तसेच मानवामध्येही मुले मोठी झाल्यावर आपल्या पुढील आयुष्यासाठी प्रसंगी घरापासून दूर होतात; मात्र ती आयुष्यभर आपल्या आई- वडिलांशी संबंधित राहतात. अशाप्रकारे, पक्षी व मानव हे दोघे कुटुंबवत्सल सजीव आहेत.