Question

उताऱ्याच्या आधारे सूचनेनुसार कृती करा.

१. एका शब्दात उत्तर लिहा.  (२)

1. थंडी कमी होण्याची वेळ- ______
2. लहानपणी लेखिका आणि त्यांच्या भावंडांना गॅलरीत झोपायला मिळायचं तो महिना - ______

होळीनंतर थंडी झपाट्यानं कमी होत जायची आणि आंब्यावर मोहोर नुसता घमघमत असायचा. परीक्षा तोंडावर आलेली असायची. मोकळ्या अंगणात अंथरुणं पडायची ती सुट्टी लागल्यावर; पण मार्च-एप्रिलमध्ये आम्हांला गॅलरीत झोपायला मिळायचं.      रात्रीचे मऊगार हात अंगावर फिरायला लागले, की झोपेची गडद चाहूल यायची. डोळे मिटताना मनात एकच संदेश जागा व्हायचा, 'उद्या कोकिळेचं 'कुहू' ऐकू येईल का? बघू हं!' पहाटे पहाटे गाढ झोपेत असतानाच तो 'कुहूऽकुहूऽ' आवाज कानावर यायचा आणि त्या आवाजाची वाट पाहण्याचं सार्थक होऊन जायचं.      सुट्टीची वाट पाहणं तर तेव्हापासून सुरू झालेलंच असायचं. अभ्यासाचा आळस नसायचा. पाठांतर आवडायचं. नेमलेली पुस्तकं गोष्टीच्या पुस्तकांइतकीच परत परत आवडीनं वाचली जायची; पण अभ्यासाचं वही-पुस्तक जरा बाजूला झालं रे झालं, की सुट्टीची आठवण उसळी मारून वर यायची. ते अंगणातलं हजारी मोगऱ्याचं झाड, शनिवारवाड्यात सकाळी सकाळी जाऊन वेचून आणलेली बकुळीची फुलं. माठातलं वाळा घातलेलं पाणी, आई-आत्यांची कुरडया-पापड्यांची घाई, अंगणभर पडणारी वाळवणं, कैरीची डाळ आणि पन्हं, कधीमधी घरची परवानगी मिळाल्यावर चोखायला मिळणारे बर्फाचे गोळे, उसाचा ताजा रस आणि मुख्य म्हणजे खूपच खूप गोष्टीची आणि कवितांची नवी पुस्तकं... सुट्टीची किती वाट पाहत असू आम्ही!

२. वैशिष्ट्ये लिहा.  (२)

लेखिकेने अनुभवलेल्या सुट्टीचे वेगळपण

३. स्वमत कृती-  (३)

उन्हाळ्याच्या सुट्टीची वाट तुम्ही पाहता का? कसे ते स्पष्ट करा.

Answer 1

१.

1. थंडी कमी होण्याची वेळ- होळीनंतरचा काळ
2. लहानपणी लेखिका आणि त्यांच्या भावंडांना गॅलरीत झोपायला मिळायचं तो महिना- मार्च - एप्रिल

२. लेखिकेने अनुभवलेल्या सुट्टीचे वेगळपण-

• अंगणातील हजारी मोगऱ्याचे झाड
• शनिवारवाड्यातून वेचून आणलेली बकुळीची फुले
• माठातलं वाळा घातलेलं पाणी
• आई-आत्यांची कुरडया-पापड्यांची घाई
• अंगणभर पडणारी वाळवणं
• कैरीची डाळ आणि पन्हं
• बर्फाचे गोळे
• उसाचा रस
• गोष्टीची व कवितांची नवी पुस्तकं

३. उन्हाळ्याची सुट्टी म्हणजे आमच्यासाठी मोठी पर्वणीच असते. आम्ही सारी भावंडे आजोळी एकत्र येतो आणि ती सुट्टी भरभरून जगतो. उन्हाळ्याच्या सुट्टीची वाट पाहणे हे साधारणपणे एप्रिल महिन्याच्या सुरुवातीपासून सुरू होते. परीक्षेचे वेळापत्रक मिळाल्यापासूनच आईबाबांना गावी कधी जाणार याची विचारणा सुरू होते. उन्हाळ्याची सुट्टी किती दिवस असणार आणि त्या दिवसात आपण काय काय करणार याच्या योजना मनातल्या मनात सुरू होतात. गेल्यावर्षी केलेली धमाल, गावची जत्रा, शेतात, नदीकिनारी मित्रांबरोबर जाणे याच्या आठवणी परत परत येत राहतात. यावर्षी नवीन काय करायचे? कोण येणार आहे? कोण भेटू शकणार नाही? याची चर्चा घरात सुरू होते. कसे जायचे याची तयारी आणि सोबतच परीक्षेची तयारी याची सांगड घालत मी उन्हाळ्याच्या सुट्टीची दरवर्षी वाट पाहतो.