Question

टिपा लिहा.

जिद्दी लेफ्टनंट स्वाती महाडिक

Answer 1

'वीरांगना' या पाठात महाराष्ट्र कन्या लेफ्टनंट स्वाती महाडिक यांचा भावुक वीरपत्नी ते सज्ज वीरांगना असा धाडसी, प्रेरक व थक्क करणारा जीवनप्रवास मांडला आहे.
         कर्नल संतोष महाडिक यांनी देशासाठी केलेल्या बलिदानानंतर त्यांची पत्नी स्वाती खचून गेल्या नाहीत. समाजाने देऊ केलेले सुखासीन जीवन नाकारत आपल्या पतीचे पहिले प्रेम जिवंत ठेवण्याचा साहसी निर्णय त्यांनी घेतला. भारतीय सैन्यदलात रुजू होता यावे, यासाठी त्यांनी विशेष परवानगी घेऊन प्रयत्नपूर्वक वयाची अट शिथिल करून घेतली. पहिल्याच प्रयत्नात 'स्टेट सिलेक्शन बोर्डाची' परीक्षा उत्तीर्ण करून शारीरिक व वैद्यकीय चाचण्या यशस्वीपणे पार पाडल्या. 'ऑफिसर्स ट्रेनिंग ॲकॅडमी' चेन्नई या लष्करी प्रशिक्षण संस्थेतून आपल्यापेक्षा निम्म्या वयाच्या तरुण वर्गासोबत अत्यंत उत्साहाने अकरा महिन्यांचे खूप खडतर प्रशिक्षण पूर्ण केले. ९ सप्टेंबर २०१७ रोजी त्या लेफ्टनंट पदावर रुजू झाल्या. सातवीतील कार्तिकी व दुसरीतील स्वराज अशी दोन गुणी मुले पदरात असतानाही आपल्या मेहनतीच्या व जिद्दीच्या बळावर सैन्यातील दोन अभिमानास्पद स्टार त्यांनी प्राप्त केले.
         लष्करी जीवन हासुद्धा जीवन जगण्याचा एक वैशिष्ट्यपूर्ण मार्ग आहे, ही त्यांची विचारसरणी आहे. आपण करत असलेल्या कोणत्याही कामाबद्दल अधिक जाणून घेऊन अधिक शिकणे व त्यासाठी कठोर परिश्रम घेणे हे त्यांचे गुणवैशिष्ट्य होय. पती निधनाचे अमर्याद दु:ख बाजूला ठेवत पतीचे अपूर्ण स्वप्न पूर्ण करणाऱ्या व भारतातील इतरही अनेक मुलींना व स्त्रियांना सैन्यदलात भरती होण्याची प्रेरणा देणाऱ्या स्वाती महाडिक यांची जिद्द त्यांच्या एकूणच जीवनप्रवासात दिसून येते.