Question

उताऱ्याच्या आधारे सूचनेनुसार कृती करा.

१) चौकट पूर्ण करा.  (२)

i. शिक्षकदिनाच्या दिवशी फार कमी निवडले जायचे ते पद	______
ii. समुद्रकिनारी वाळूचे शिल्प बनवणारे	______

 

आयुष्यात काय व्हायचं याचा निर्णय घ्यायची वेळ तुमच्यावर येणार, म्हणून एक आठवण करून देतो. दरवर्षी आपल्या शाळेत शिक्षकदिन साजरा होतो. त्यात प्रत्येकाला मुख्याध्यापक तरी व्हायचं असतं नाहीतर शिक्षक तरी; पण शिपाई व्हायची इच्छा फार कमी मुलांची असते. तुम्ही शिपाई व्हायलाच पाहिजे असं नाही; पण शिपाई होऊन सुद्धा चांगलं काम करता येऊ शकतं, आपण कौतुकास पात्र होऊ शकतो या गोष्टीवर तुमचा विश्वास नाही का? मला एकच गोष्ट माहीत आहे कोणतंही काम केलं, तरी ते असं करायचं, की लोकांनी नाव घेतलं पाहिजे. काम छोटं नसतं. आता चार्जरच बघा. चार्जर नसला तर मोबाइलचा काही उपयोग आहे का? डॉक्टर एवढीच नर्सपण महत्त्वाची असते. तुम्ही बघा क्रिकेटचा कॅप्टन विराट कोहली असो किंवा धोनी, त्याला मैदानावरच्या खेळपट्टीची काळजी घेणाऱ्याचं महत्त्व जास्त असतं. कारण सामन्याचा निर्णय ठरवण्यात खेळपट्टीचा खूप मोठा वाटा असतो. समुद्रकिनारी वाळूत शिल्प बनवणारे ओरिसाचे सुदर्शन पटनायक पूर्ण देशात प्रसिद्ध आहेत. लग्नाच्या मांडवात बसून खूप लोक सनई वाजवताना दिसतात; पण बिस्मिल्लाह खान सनई एवढ्या मन लावून वाजवायचे, की त्यामुळे ते जगभर लोकप्रिय झाले.

२) जोड्या जुळवा.  (२)

'अ' गट	'ब' गट
क्रिकेटच्या सामन्याचा निर्णय ठरवणारी	नर्स
हा नसेल तर मोबाइलचा उपयोग नाही	बिस्मिल्लाह खान
डॉक्टर बरोबर ही असावीच लागते	खेळपट्टी
सनई वादनाने लोकप्रिय झालेले	चार्जर

३) स्वमत- (३)

शाळेतील शिक्षकदिनाच्या दिवशी तुम्ही कोणते पद स्वीकारता किंवा कोण व्हायला आवडते व का? ते लिहा.

Answer 1

१)

i. शिक्षकदिनाच्या दिवशी फार कमी निवडले जायचे ते पद	शिपाई
ii. समुद्रकिनारी वाळूचे शिल्प बनवणारे	ओरिसाचे सुदर्शन पटनायक

२)

'अ' गट	'ब' गट
क्रिकेटच्या सामन्याचा निर्णय ठरवणारी	खेळपट्टी
हा नसेल तर मोबाइलचा उपयोग नाही	चार्जर
डॉक्टर बरोबर ही असावीच लागते	नर्स
सनई वादनाने लोकप्रिय झालेले	बिस्मिल्लाह खान

३)

मला लहानपणापासूनच मराठी भाषा आणि मराठी भाषेचे शिक्षक यांविषयी कायम आपलेपणा वाटत आला आहे. मोठेपणी आपणसुद्धा मराठी भाषेचे शिक्षक बनावे अशी माझी इच्छा आहे. मराठी भाषा शिकवण्याचा प्रत्यक्ष अनुभव घेण्यासाठी मी शाळेतील शिक्षकदिनाच्या दिवशी मराठी विषय शिक्षक हे पद स्वीकारतो. मराठी कविता शिकवताना, त्या चाल लावून म्हणताना एक वेगळाच आनंद मला मिळतो. आपली मातृभाषा जगली पाहिजे व त्यासाठी आपलादेखील हातभार लागावा याकरता मी याची सुरुवात म्हणून शाळेतील शिक्षकदिनाच्या दिवशी मराठी विषय शिक्षक बनतो.