Advertisements
Advertisements
Question
मुद्द्यांच्या आधारे चौकटीतील घटकाचे आत्मकथन लिहा.
Advertisements
Solution
छत्री
“नमस्कार मित्रांनो! पावसाचा पहिला थेंब जमिनीवर पडला की, तुम्हाला सर्वात आधी कोणाची आठवण येते? माझीच ना? मी तुमची लाडकी छत्री बोलतेय. आज मला माझे मनोगत तुमच्यासमोर मांडायचे आहे.
माझे रंग, रूप आणि प्रकार काळानुसार खूप बदलले आहेत. पूर्वी मी फक्त काळ्या रंगात आणि जड लोखंडी सांगाड्यात उपलब्ध असायचे. पण आज मी लाल, निळा, पिवळा अशा अनेक आकर्षक रंगांत आणि नक्षीकामात दिसते. लहान मुलांसाठी कार्टूनवाल्या छत्र्या, तर मोठ्यांसाठी सुटसुटीत ‘फोल्डिंग’ छत्र्या अशा विविध प्रकारांत मी आज मिरवते. काळानुरूप माझ्यात खूप बदल झाले आहेत; मी आता अधिक हलकी, मजबूत आणि दिसायला सुंदर झाली आहे.
माझी उपयुक्तता तुमच्या जीवनात किती महत्त्वाची आहे, हे वेगळे सांगायला नको. धो-धो बरसणाऱ्या पावसात स्वतः ओले होऊन मी तुम्हाला कोरडे ठेवते. इतकेच नाही, तर रणरणत्या उन्हातही मी तुमची सावली बनून तुमचे रक्षण करते. तुमच्या शाळेच्या प्रवासात किंवा ऑफिसला जाताना मी तुमची हक्काची सोबती असते.
पण माझ्या मनात एक मोठी खंत आहे. पावसाळा संपला की अनेक जण मला घराच्या एखाद्या अडगळीच्या कोपऱ्यात फेकून देतात. वर्षभर माझी कोणालाच आठवण येत नाही. कधी कधी प्रवासात घाईघाईत लोक मला विसरून जातात, तेव्हा मला खूप एकटे वाटते. वाऱ्याच्या वेगाने माझ्या काड्या मोडल्या की माझी नीट डागडुजी केली जात नाही, याचे मला वैषम्य वाटते. तरीही, माणसांच्या सेवेसाठी सदैव तत्पर राहणे आणि त्यांच्या आयुष्यात ‘सावली’ बनून राहणे, यातच मी माझ्या जीवनाचे सार्थक मानते.”
