Question

शिरीषमधील तुम्हांला समजलेली गुणवैशिष्ट्ये सोदाहरण स्पष्ट करा.

Answer 1

शिरीष हा अत्यंत समंजस, वडिलांवर मनापासून प्रेम करणारा, त्यांचे संगीतसेवेचे स्वप्न स्वत: साकार करणारा ध्येयवेडा मुलगा आहे. वडिलांनी अपघातात ऐकण्याची क्षमता गमावल्यानंतर, त्यांची संगीताप्रती निष्ठा पाहून, त्यांच्या सुखाकरता तो वादन शिकायला लागला. आपल्या व्हायोलिनच्या शिकवणीवर्गाला वडिलांना सोबत नेऊ लागला. आपल्या या छोट्या छोट्या कृतींद्वारे शिरीष वडिलांना आनंद देण्याचा प्रयत्न करत होता. आपल्या दांडग्या आकलनशक्तीने व हलक्या हाताच्या उत्कृष्ट वादन कौशल्याने त्याने तीन महिन्यांत वादनात बरीच प्रगती केली.

शिरीष हुशार व अभ्यासू वृत्तीचा आहेच; पण मनाने संवेदनशीलही आहे, म्हणूनच आपण वादनात कितीही प्रगती व कौशल्य दाखवले तरी नाना ते ऐकू शकत नाहीत, याची टोचणी त्याला आहे. तसाच तो प्रामाणिकही आहे, कारण त्याने आपल्या गैरहजेरीच्या कारणाचा निरोप व फीचे पैसे एका माणसामार्फत लेखकापर्यंत पोहोचवले. नाना वारल्यानंतर, नानांवरच्या प्रेमापोटी त्याने चोवीस तास ध्यासपूर्वक संगीतसाधना केली. ऐन कार्यक्रमादिवशी या नवख्या वादकाने धिटाईने व आत्मविश्वासपूर्वक अप्रतिम व्हायोलिन वादन करून लेखकालाही आश्चर्यचकित केले.

म्हणूनच, पितृप्रेम, धीटपणा, आत्मविश्वास, प्रामाणिकपणा, दांडगी आकलनशक्ती, ध्येयवेडी वृत्ती, कठोर मेहनत अशी शिरीषची कित्येक स्वभाववैशिष्ट्ये मनाला भावतात.