Question

खालील विषयावर बातमी तयार करा.

8 मार्च ‘जागतिक महिला दिनानिमित्त’ शाळेत ‘माता-पालक मेळावा’ व विविध स्पर्धांचे आयोजन पालकांचा उदंड प्रतिसाद.

Answer 1

जागतिक महिला दिन : माता-पालक मेळावा

धुळे, दि. ९ मार्च: धुळे येथील ‘अभिनव विद्यामंदिर’ शाळेतर्फे काल ८ मार्च रोजी जागतिक महिला दिन अत्यंत वेगळ्या आणि उपक्रमशील पद्धतीने साजरा करण्यात आला. या निमित्ताने महिलांच्या सन्मानासाठी शाळेत ‘माता-पालक मेळावा’ आयोजित करण्यात आला होता.

या मेळाव्याचे उद्घाटन उपस्थित माता-पालकांपैकी सुप्रसिद्ध स्त्रीरोगतज्ज्ञ डॉ. श्रीमती सुधा नाडकर्णी यांच्या हस्ते झाले. कार्यक्रमादरम्यान महिलांसाठी विविध स्पर्धांचे आयोजन करण्यात आले होते. सर्व स्पर्धांमध्ये माता-पालकांनी उत्स्फूर्तपणे सहभाग घेतला. स्पर्धांतील विजेत्यांना पारितोषिके देऊन सन्मानित करण्यात आले.

कार्यक्रमाच्या अध्यक्षस्थानी समाजसेविका श्रीमती पाटील मॅडम उपस्थित होत्या. त्यांनी माता-पालकांशी मुक्त संवाद साधत त्यांच्या समस्या व प्रश्न जाणून घेतले. या संवादातून महिलांना योग्य मार्गदर्शन व प्रेरणा मिळाल्याची भावना सहभागी महिलांनी आपल्या मनोगतातून व्यक्त केली.

शाळेच्या मुख्याध्यापिका श्रीमती वर्षा कारखानीस यांच्या उत्कृष्ट सूत्रसंचालनामुळे तसेच माता-पालकांच्या मोठ्या प्रतिसादामुळे कार्यक्रम अतिशय यशस्वी आणि उत्साही वातावरणात पार पडला. यावेळी समाजात उल्लेखनीय कार्य करणाऱ्या कर्तबगार महिलांचा विशेष सत्कारही करण्यात आला.