Question

खालील कथालेखन करा.

महेंद्र नावाचा विद्यार्थी ______ हलाखीची परिस्थिती ______ रानात रोपट्यांचा शेंडा तुटलेला पाहाणे ______ मनात विचार ______ आत्मज्योत जागृत होणे ______ प्रयत्नांची पराकाष्ठा ______ यशस्विता ______ लेखक म्हणून प्रसिद्धी.

Answer 1

मेहनतीचे फळ

माणगांव नावाच्या खेड्यात एका गरीब कुटुंबात महेंद्रचा जन्म झाला. आपल्या विद्यार्थिदशेत त्याच्या घरची परिस्थिती अत्यंत हलाखीची होती. दोन वेळचे जेवण मिळणे देखील कठीण होते. गरिबीचे चटके असह्य होऊन निराशेच्या भरात तो एकदा जंगलात निघून गेला. मनात विचार येत होते, की कधीच घरी परत जायचे नाही. चालून चालून थकल्यामुळे एका झाडाखाली तो बसला. इकडे तिकडे पाहत असताना त्याने काही रोपट्यांचा शेंडा तुटलेला पाहिला. त्याच्या मनात चटकन काहीतरी विचार चमकला. झाडाचा शेंडा तुटलेला आहे; पण झाड अजूनही जिवंत आहे. नव्या फांद्यांनी, पानांनी ते बहरत आहे. त्याने हार मानलेली नाही. लढण्याची वृत्ती आपण दाखवली, तर आपणही असेच झाडासारखे ताठ मानेने जगू शकतो. हे विचार मनात येताच तो उठला. महेंद्र जंगलातून परतला, तो एक सकारात्मक विचार मनात घेऊन. त्याची आत्मज्योत जागृत झाली होती. त्याने मनाशी ठरवले आता रडायचे नाही, तर लढायचे. घरकाम करून रात्रशाळेत जात त्याने आपले शिक्षण पूर्ण केले. प्रयत्नांची पराकाष्ठा केली. महाविद्यालयात शिकत असतानाच त्याला लेखनाचा छंद लागला. तो लिहू लागला. त्याचे लेखन प्रसिद्ध होऊ लागले. लोकांकडून कौतुक होऊ लागले. त्याच्या पुस्तकांचा खप वाढला. त्याला लेखक म्हणून प्रसिद्धी मिळाली आणि त्याचे नाव यशस्वी लेखकांमध्ये घेतले जाऊ लागले. कोणतीही गोष्ट साध्य करण्यासाठी मोडून पडलो तरीही उभे राहण्याचे धाडस त्या जंगलातील शेंडे तुटलेल्या रोपट्यांकडून महेंद्र शिकला आणि त्याने आपले जीवन यशस्वी करण्याच्या दिशेने प्रवास सुरू केला. तात्पर्य: परिस्थिती वर मात करून विजय मिळवणे.