Question

प्रसंगलेखन-

खालील बातमी वाचा.

वरील प्रसंगी तुम्ही उपस्थित होता. त्या भावपूर्ण प्रसंगाचे लेखन करा.

Answer 1

एक अविस्मरणीय कारगिल दिन

मे -जुलै १९९९... माझ्या जन्मापूर्वी, घडलेला एक भयावह संग्राम. या संदर्भातील जनरल वी. पी. मलिक यांचं 'कारगिल' नावाचं पुस्तक एकदा वाचनात आलं होतं. त्यावेळचा संग्राम, त्यात झालेली हानी, शहीद जवान व त्यांची विखुरलेली कुटुंबे, कायमचे अपंग झालेले जवान ... या विचारचक्रात गुंतलेलो असताना कधी ६ वाजले ते कळलेच नाही. आज कारगिल दिनानिमित्त शाळेच्या पटांगणावर एका विशेष कार्यक्रमाचे आयोजन केले होते.

मुख्याध्यापकांच्या भाषणाने कार्यक्रमाला प्रारंभ झाला. ५२७ जणांचे बलिदान, त्यामागील रक्तरंजित कहाण्या आणि त्यांच्या कुटुंबांची झालेली वाताहत सारं ऐकून मन विषण्ण होत होते. यानंतर अमर जवान मेजर रमाकांत यांना भावपूर्ण श्रद्धांजली दिली गेली. याप्रसंगी त्यांच्या वीरपत्नी व वीरमाताही उपस्थित होत्या. मेजर रमाकांत यांच्या आईने त्यांच्या आठवणींना उजाळा दिला.

लहानपणापासूनच मेजर रमाकांत यांना सैन्यदलाचे आकर्षण होते. त्यांनी सैन्यदलात भरती होण्याचा जणू ध्यासच घेतला होता. 'मातृभूमीचे रक्षण करणे ही प्रत्येकाची जबाबदारी असून त्यासाठी सर्वोच्च बलिदान देण्यासाठीही मी तयार आहे', असे ते नेहमी म्हणत. कारगिल युद्धात पाकिस्तानच्या काही सैन्याने काश्मीर प्रांतात घुसखोरी केली. त्यांना रोखण्यासाठी भारतीय जवानांनी शर्थीचे प्रयत्न केले. मेजर रमाकांत यांनी शत्रू सैन्यातील सहा जणांना मृत्यूच्या दाढेत ढकलले. शरीरावर पाच गोळ्या लागूनही शेवटच्या श्वासापर्यंत ते लढत राहिले. त्यांच्या तुकडीने शत्रूसैन्याचा फडशा पाडला, त्यानंतरच त्यांनी अखेरचा श्वास घेतला. या घटनेने अकोला शहर दु:खात बुडाले. संपूर्ण भारतभर त्यांना भावपूर्ण श्रद्धांजली देण्यात आली होती.

ही सारी कहाणी त्या वीरमातेच्या तोंडून ऐकताना डोळ्यांत अश्रूंनी दाटी केली होती. वारंवार अंगावर रोमांच उभे राहत होते, हृदय देशप्रेमाने व कृतज्ञतेने भरून गेले होते. आपल्या पतीने देशसेवा करता करता वीरमरण कवटाळले हे सांगताना वीरपत्नीला अश्रू अनावर झाले होते. त्या भावपूर्ण वातावरणाने भारलेल्या आम्हांला सैनिकांच्या त्यागाचे स्मरण झाले होते. मन कृतज्ञतेने काठोकाठ भरले होते.