Question

खालील मुद्द्यांच्या आधारे लेखन करा.

Answer 1

भ्रमणध्वनी नसते तर...!

'आईने मोबाइल विकत घेऊन दिला नाही, म्हणून मुलाने आत्महत्या केली' ही वर्तमानपत्रातील बातमी वाचताना मनात विचार आला, की भ्रमणध्वनी नसता तर.....?

खरंच, भ्रमणध्वनी नसता, तर त्याच्या हट्टापायी मुलांना जीव गमवावा लागला नसता. मुले ब्लू व्हेलसारख्या गेम्सच्या आहारी जाऊन आत्महत्या करण्यास प्रवृत्त झाली नसती. भ्रमणध्वनी हातात नसताना वाढणारी मानसिक अस्वस्थता, चिडचिड कमी झाली असती.

तंत्रज्ञानाने दुरावलेली माणसं प्रत्यक्षात भेटू लागली असती व प्रत्यक्षपणे आपल्या आनंदाचे, दु:खाचे, भाव-भावनांचे आदानप्रदान झाले असते. सातत्याने मोबाइलमध्ये गुंतलेली बच्चेकंपनी मैदानात खेळताना, पळताना , प्रसंगी पडताना व त्यातून उठतानाही दिसली असती. वाढदिवस व्हॉट्सअँपवर नाही, तर प्रत्यक्ष घरी जाऊन साजरे झाले असते. आंतरजालाचा दुरुपयोग कमी झाला असता व त्यातून समाजविघातक प्रवृत्तींना आळा बसला असता.

पण..... भ्रमणध्वनी नसता, तर संपर्काचे माध्यम तुटले असते हे खरे. गरजेच्या वेळी हा भ्रमणध्वनीच देवासारखा धावून येतो. अडचणीत असलेल्या माणसांना भ्रमणध्वनीमुळे त्या संकटातून बाहेर येता आल्याची अनेक उदाहरणे आहेत. महत्त्वाच्या निरोपांचे आदानप्रदान या संपर्कमाध्यमातूनच शक्य होते. आज या मोबाइलमुळे हवी ती माहिती काही सेकंदांमध्ये आपल्यासमोर हजर होते. औद्योगिक जगतात अनेक वेळा मोबाइल कॉन्फरन्सिंगद्वारे महत्त्वाच्या सभा घेऊन उद्योगासंबंधी निर्णय घेतले जातात. भ्रमणध्वनीशिवाय हे सर्व कसं शक्य झालं असतं?

आपण गेम कसे खेळलो असतो? गणिते सोडवताना झटपट आकडेमोड कशी झाली असती? इंटरनेट नसते, तर मनोरंजनाचे कार्यक्रम बंद झाले असते. मग व्हॉट्सअँप, फेसबुक, ट्विटर, ऑर्कुट सारं काही बंद. अरे देवा, मग आयुष्यात काही मजाच राहिली नसती. 

त्यामुळे, भ्रमणध्वनी नसणं ही कल्पना या काळात करणं अवघडच आहे; पण त्याच्या वापराच्या बाबतीत चांगल्या सवयी लावून घेतल्यास ते या पिढीला मिळालेले वरदानच ठरेल हे निश्चित!