Question

‘माझा आवडता मित्र/मैत्रीण’ या विषयावर थोडक्यात माहिती लिहा.

Answer 1

माझी आवडती मैत्रीण

सायली ही माझी सर्वांत आवडती मैत्रीण आहे. आम्ही दोघी इयत्ता पाचवीमध्ये सर्वप्रथम भेटलो. नवीन शाळा, माध्यमिक शाळेतील तासाप्रमाणे बदलणारे शिक्षक हे सर्व पाहून मी भांबावून गेले होते. अशावेळी सायलीने आपल्या समजूतदार व मनमिळाऊ स्वभावाने मला धीर दिला व पहिल्या दिवसापासूनच आमची गट्टी जमली. सायलीला चित्रकला व हस्तकलेची फार आवड आहे. ती नेहमी काही ना काही कलात्मक वस्तू बनवत असते; त्यामुळे वर्ग सजवण्यात तिचा वाटा मोठा असतो. सायली जितकी प्रेमळ व समजूतदार आहे तितकीच शिस्तप्रियही! यामुळेच ती शाळेची शिस्तमंत्री आहे. आम्ही दोघी जवळच राहत असल्याने गृहपाठही एकत्र करतो. माझ्या आईलासुद्धा सायली खूप आवडते. आमच्यात कधीतरी भांडणही होते. अशावेळी थोड्या रुसव्या-फुगव्यानंतर आम्ही दोघी पुन्हा बोलू लागतो. एकमेकांशिवाय आम्हांला करमतच नाही. दिवसेंदिवस आमच्यातली मैत्री बहरतच आहे.