Question

खालील अपूर्ण कथा वाचा. तुमच्या विचार व कल्पनेने कथा पूर्ण करा.

२६ जानेवारी, भारताचा गणतंत्र दिन. अर्णव स्वच्छ शालेय गणवेशात तयार होऊन शाळेत गेला. माननीय प्रमुख पाहुण्यांच्या उपस्थितीत कार्यक्रम सुरु झाला. विद्यार्थ्यांनी ध्वजवंदन केले. राष्ट्रगीत, ध्वजगीत, देशभक्तीपर गीत सादर केले. अध्यक्षांच्या प्रेरणादायी भाषणानंतर अर्णवचे देशभक्तीचा संदेश देणारे व देशभक्ताबद्दल कृतज्ञता व्यक्त करणारे भाषण झाले. वृक्षारोपण, खाऊवाटप झाल्यानंतर मुले घरी जायला निघाली. अर्णवदेखील आपली तीनचाकी सायकल घेऊन निघाला. सावकाशपणे हुतात्मा चौकापर्यंत पोहोचला. लाल दिव्याचा संकेत मिळताच जागेवरच थांबला. चौकात खूप गर्दी होती. अनेक छोटी मुलं हातात छोटे तिरंगी झेंडे घेऊन पालकांच्या वाहनांवर बसली होती. हिरवा दिवा दिसताच थांबलेली गर्दी पुढे सरकली. अर्णवनेही हाताने चाकाला वेग दिला. एवढ्यात सर्वांचं लक्ष वेधून घेणारं असं.....

• तुम्ही लिहिलेल्या कथेला योग्य शीर्षक द्या व तात्पर्य लिहा.  
• तुम्ही कथा तयार करताना व लिहिताना कोण कोणत्या गोष्टी विचारात घेतल्या, त्यांची यादी करा.

Answer 1

खरा गणतंत्र दिन

२६ जानेवारी, भारताचा गणतंत्र दिन. अर्णव स्वच्छ शालेय गणवेशात तयार होऊन शाळेत गेला. माननीय प्रमुख पाहुण्यांच्या उपस्थितीत कार्यक्रम सुरु झाला. विद्यार्थ्यांनी ध्वजवंदन केले. राष्ट्रगीत, ध्वजगीत, देशभक्तीपर गीत सादर केले. अध्यक्षांच्या प्रेरणादायी भाषणानंतर अर्णवचे देशभक्तीचा संदेश देणारे व देशभक्ताबद्दल कृतज्ञता व्यक्त करणारे भाषण झाले. वृक्षारोपण, खाऊवाटप झाल्यानंतर मुले घरी जायला निघाली.

अर्णवदेखील आपली तीनचाकी सायकल घेऊन निघाला. सावकाशपणे हुतात्मा चौकापर्यंत पोहोचला. लाल दिव्याचा संकेत मिळताच जागेवरच थांबला. चौकात खूप गर्दी होती. अनेक छोटी मुलं हातात छोटे तिरंगी झेंडे घेऊन पालकांच्या वाहनांवर बसली होती. हिरवा दिवा दिसताच थांबलेली गर्दी पुढे सरकली. अर्णवनेही हाताने चाकाला वेग दिला. एवढ्यात सर्वांचं लक्ष वेधून घेणारं असं दृश्य दिसलं. चौकाच्या मध्यभागी काही मुलं जमलेल्या गर्दीशी काहीतरी बोलत होती. नंतर त्याच्या लक्षात आलं, की काही मुलं-मुली रस्त्यावर पडलेले तिरंगे वेचत होती आणि जमा करून चौकाकडे धाव घेत होती.

चौकाच्या मध्यभागी जमलेल्या गर्दीत जाऊन तो उभा राहिला. एक मुलगा गर्दीशी संवाद साधत होता, ’सायबांनो, तुमी असे नका न वागू! हा तिरंगा आपल्या देशाचा अभिमान हाये, त्याला असे रस्त्यावर नका ना भिरकावू. सकाळी उठून तिरंग्याला सलाम ठोकायचा नि घरी जाताना तोच कचऱ्यवानी कुटंभी फेकून द्यायाचा? आम्हांला तर तुमचीच लाज वाटून राहिली, म्हणून तुम्ही टाकलेले हे तिरंगे गोळा करून आम्ही गणतंत्र दिवस साजरा करत आहोत. आपल्या तिरंग्याचा अपमान न करनं हाच आमचा गणतंत्र दिन हाय,“ तो कळकळीने सांगत होता. थोड्याच वेळात त्याच्या शाळेतल्या मुलांनी याच विषयावर तिथे पथनाट्य सादर केले व सर्वांना देशाचा आदर करण्याची प्रतिज्ञा घ्यायला लावली. परिस्थितीशी झुंजत शिक्षण घेणाऱ्या त्या गरीब मुलांच्या या नव्या उपक्रमाने आज सर्व सुशिक्षितांचे डोळे उघडले होते. अर्णवला हा त्यांचा उपक्रम फार आवडला होता. या उपक्रमात सहभागी होण्याचा निर्धार करून तो घरी परतला.

तात्पर्य: राष्ट्राभिमान जपण्यासाठी राष्ट्रीय प्रतीकांचा सन्मान राखणे खूप महत्त्वाचे आहे.

• रस्त्यावरची महत्त्वपूर्ण घटना, त्या गरीब मुलांचा नवा उपक्रम, त्यांची पथनाट्याची कल्पना, त्यांतून लोकांना मिळणारा संदेश, अर्णवचा सहभाग.