Question

आत्मकथन-

खालील दिलेला महामार्गावरील सूचनाफलक तुमच्याशी बोलतो आहे, अशी कल्पना करा व त्या घटकाचे आत्मकथन लिहा.

♦ वाहने हळू चालवा. ♦ पुढे एक किलोमीटरचा घाट आहे. ♦ गरज पडेल तेव्हा कर्णभोंगा वाजवा. ♦ गतिरोधकावर वाहनाची गती कमी करा. ♦ वाहन चालवतांना भ्रमणध्वनी बंद ठेवा. ♦ लक्षात ठेवा - ‘नाही पेक्षा उशीर बरा’.

Answer 1

मी महामार्गावरील सूचनाफलक बोलतो आहे...

’हे समस्त मानवप्राण्यांनो, आमची निर्मिती तुम्हांला संकटातून वाचवण्यासाठी झाली आहे; पण हे सांगण्याची पाळी आमच्यावरच यावी यासारखी दु:खाची बाब नाही. आम्हांला रंगरंगोटी करून रस्त्यांवर लावले जाते ते केवळ शोभेसाठी नव्हे. त्यावर लिहिलेला संदेश वाचा. त्यानुसार आचरण करा तरच तुम्ही व इतर लोकही सुरक्षित राहतील.

बाबांनो, वाहने चालवताना ती हळू चालवा. 'अति घाई संकटात नेई' म्हणतात ते उगाच नाही. वेळेपेक्षा दहा मिनिटे लवकर निघा रे. घाटात मी उभा असतो 'पुढे एक किलोमीटरचा घाट आहे' या सूचनेसह. तरीही अपघात घडतात. सुरक्षित प्रवास ही प्रत्येकाची जबाबदारी आहे, म्हणून 'गरज पडेल तेव्हा कर्णभोंगा वाजवा', 'गतिरोधकावर वाहनाची गती कमी करा' या आणि अशा अनेक सूचनांचे पालन करा. त्या तुमचे प्राण वाचवतील याची खात्री मी देतो.

आजकाल तर तुमच्या मोबाईलने (भ्रमणध्वनीने) कित्येकांचे जीव घेतले असतील. जर भ्रमणध्वनीवर बोलायचेच असेल, तर गाडी बाजूला थांबवून बोला. अन्यथा गाडी चालवताना भ्रमणध्वनी बंद करून ठेवा. त्याने तुमचे व समोरच्याचेही प्राण वाचतात. लक्षात ठेवा, 'नाही पेक्षा उशीर बरा!' त्यामुळे या सूचना वेळोवेळी पाळा व अपघात कायमचे टाळा.

बाळांनो, माझ्याकडे हात-पाय असते ना, तर येणाऱ्या या संकटांपासून मीच तुम्हांला वाचवले असते; पण माझ्याकडे फक्त तुम्हांला एका जागी उभे राहून सूचना देण्यापलीकडे काही नाही. तुम्ही तुमच्या कर्तव्यांकडे डोळेझाक करू नका म्हणजे निरपराधांचे व स्वत:चे प्राण वाचतील आणि माझ्याही अस्तित्वाला अर्थ मिळेल. चला, काळजी घ्या.“