Question

खालील दिलेल्या मुद्द्यांच्या आधारे कृती सोडवा.

कृती	‘अंकिला मी दास तुझा’
(1) प्रस्तुत कवितेचे कवी/कवयित्री -
(2) प्रस्तुत कवितेचा विषय -
(3) प्रस्तुत कविता आवडण्याचे वा न आवडण्याचे कारण -
(4) दिलेल्या ओळींचा सरळ अर्थ -	‘वणवा लागलासे वनीं। पाडस चिंतीत हरणी ॥’
(5) प्रस्तुत कवितेतील शब्दांचा अर्थ -	(i) माता -
	(ii) कनवाळू -
	(iii) काज -
	(iv) धेनू -

Answer 1

कृती	‘अंकिला मी दास तुझा’
(1) प्रस्तुत कवितेचे कवी/कवयित्री -	कवी - संत नामदेव
(2) प्रस्तुत कवितेचा विषय -	आई, प्राणी, पक्षी यांच्या विविध दृष्टांतातून मातेच्या वात्सल्यपूर्ण प्रेमाचे वर्णन करत, कवीने या अभंगात भक्तवत्सल विठाईमाऊलीच्या कृपेची याचना केली आहे.
(3) प्रस्तुत कविता आवडण्याचे वा न आवडण्याचे कारण -	कवी संत नामदेव महाराज यांनी श्री विठ्ठलावर कृपा करण्याची विनंती करताना देवाशी अतिशय जवळचे नाते जोडले आहे. त्यांनी यासाठी आई-बाळ, पक्षिणी-पिल्लू, धेनू-वासरू, हरिणी-पाडस यांसारखी समर्पक उदाहरणे दिली आहेत. परमेश्वर कृपेची तीव्र इच्छा कवीने मेघ व चातक यांच्या उदाहरणातून अतिशय प्रभावीपणे व्यक्त केली आहे. वारकरी संप्रदायाचे दैवत असलेल्या श्री विठ्ठलावरील कवीची नितांत श्रद्धा आणि उत्कट भक्ती यांनी भरलेला हा अभंग मला खूप आवडतो.
(4) दिलेल्या ओळींचा सरळ अर्थ -	संत नामदेव महाराज विठाईमाऊलीची कृपा मागताना हरिणी आणि तिच्या पाडसाचा दृष्टांत देतात. ते म्हणतात, 'हे परमेश्वरा, जंगलात वणवा पेटलेला पाहून हरिणी आपल्या पाडसाच्या सुरक्षिततेसाठी चिंतीत होते. त्या पाडसाप्रमाणेच माझीही अवस्था झाली आहे. त्यामुळे तू माझ्यासाठी लवकरात लवकर धावून ये.
(5) प्रस्तुत कवितेतील शब्दांचा अर्थ -	(i) माता - आई, जननी
	(ii) कनवाळू - ममताळू
	(iii) काज - काम
	(iv) धेनू - गाय